چمکا ہے شبِ تارِ تخیل میں نیا چاند
آئینہء مدحت میں ہے پھر عکس نما چاند
خورشید ہُوا شعلہ بجاں کس کی طلب میں
ہے کس کی تمنا میں یہ آغوش کُشا چاند
غازہ رخِ گردوں پہ تری گردِ سفر کا
سینے پہ سجائے ہوئے نقشِ کفِ پا چاند
شب بھر رخِ والشمس سے دریوزہ گری کو
کشکول کی صُورت میں نکلتا ہے سدا چاند
اک جلوہ گہِ ناز کے ہیں کتنے مظاہر
یہ رنگِ چمن، موجہء گل، بادِ صبا، چاند
ہے مہرِ جہاں تاب ترے رُخ کی تجلّی
اور عکسِ تجلّی ہے کفِ شب پہ دھرا چاند
یہ دیدہء عالم ابھی حیران ہے شاکر
اک جنبشِ انگشت پہ ہوتا ہے فدا چاند؟
شاعر کا نام :- سیّد شاکر القادری چِشتی نِظامی
کتاب کا نام :- چراغ