کِتّھوں جا کے تویت لیاواں
ماہی میری گل نہ سُنے
نہ میرے ول آوے جاوے
نہ بولے نہ کول بٹھاوے
نی میں فیر وی مردی جاواں
ماہی میری گل نہ سُنے
ویکھیا جے میرے دل دا جانی
جیوں اُتریا چن اسمانی
تے میں ڈردی ہتھ نہ لاواں
ماہی میری گل نہ سُنے
جتّھے اوہدا پئے پر چھاواں
مِٹی چُک چُک سینے لاواں
اَکھاں پَیراں ہیٹھ وچھاواں
ماہی میری گل نہ سُنے
جُگ جُگ جیوے خوشیاں مانے
اعظؔم نوں جانے نہ جانے
میں اپنی پریت نبھاواں
ماہی میری گلّ نہ سُنے
شاعر کا نام :- محمد اعظم چشتی
کتاب کا نام :- کلیاتِ اعظم چشتی