مدعائے کن فکاں ہیں رحمت اللعالمیں
زینتِ کون و مکاں ہیں رحمت اللعالمیں
جن کے نقشِ پا ہیں کعبہ اہلِ ایماں کے لیے
قبلہ گاہ ِ عارفاں ہیں رحمت اللعالمیں
دافعِ رنج و الم ہیں ہر پریشاں کے لیے
چارہء بیچارگاں ہیں رحمت اللعالمیں
خالقِ کون و مکاں ہے رحمتِ عالم کا رب
شوکتِ کون و مکاں ہیں رحمت اللعالمیں
عفو عصیاں کے لیے پیش خدائے ذوالجلال
بے زبانوں کی زباں ہیں رحمت اللعالمیں
ہے کوئی نا کوئی ایسی بات کہ تجھ پر ادیبؔ
اس قدر جو مہرباں ہیں رحمت اللعالمیں
شاعر کا نام :- حضرت ادیب رائے پوری
کتاب کا نام :- خوشبوئے ادیب