اللہ تعالیٰ ہے جہانوں کا اجالا

اللہ تعالیٰ ہے جہانوں کا اجالا

ہر آن ہے روپ اس کا نیا اور نرالا

---

ہر موجِ نفس اس کی عنایات کا شاہد

ہر رنگِ سحر اس کی صداقت کا حوالہ

---

سیّاروں پہ آثارِ نمو اس کے کرشمے

صحرا میں جھلک اس کی دکھائیں گل و لالہ

---

جنگل میں شجر اس کی توجہ سے ہرے ہیں

ہر نوعِ خلائق کا وہی پالنے والا

---

کرتا ہے مداوا وہ پریشانی دل کا

دیتا ہے وہی عاجز و بیکس کو سنبھالا

---

حق اس کے محامد کے بیاں کیسے ہوں تائبؔ

وہ فہم سے برتر ہے، وہ ادراک سے بالا