چھڈ دیس نگاراں دا
کدھر نوں ٹری جاندا اے ، ایہ جیش بہاراں دا
اِس کتول جانا اے
جو لشکر تاریاں دا ، دھرتی تے روانا اے
سالار کھلوتا اے
یاں عزم تے ہمت دا ، کہسار کھلوتا اے
اوہ پیا فرماندا اے
رنگ جگ نے بدل لیا ، حق مٹ دا جاندا اے
باطل جو شاہی اے
ہتھ اوہدا کوئی پکڑے ، ایہ حکم الٰہی اے
مقصود شہادت اے
جیونا وچ ظلماں دے ، اک جُرم اے ، ذلت اے
ایہ کیہڑا اجاڑ آیا
اڑ کھلتا جتھے آکے ، گھوڑا اُس مدنی دا
منشا سی مشیّت دا
اُس شہ اسواراں دے ، راہوار دا رُک جانا
اُترن دا حُکم دِتا
مالک دی مرضی نوں ، حضرتؐ نے پا لتّا
لگدے نیں پئے خیمے
مدنی اسواراں دے ، اج علقمہ دے کنڈھے
معلوم سی کد لوکاں
چمکن گیاں ایہ تھاواں ، وسّن گیاں ایہ جھوکاں
کد جگ نوں خبر ہیسی
زیویں ایہ کربل دی ، اسماں کد بنسی
اندازہ ایہ کنہوں سی
اس تھاں دی زیارت لئی، آون گے فرشتے وی
شاعر کا نام :- حفیظ تائب
کتاب کا نام :- اَصحاَبِی کَاالنُّجُوم