سلام گُلشن توحید کی بہار سلام
سلام ملکِ رسالت کے تاجدار سلام
سلام رازِ حقیقت کے پردہ دار سلام
سلام خالِق اکبر کے راز دار سلام
سلام شاہد خوبانِ با وقار سلام
سلام سرور و محبوب کردگار سلام
سلام صاحب لولاک رحمتِ عالم
سلام اُمّتِ عاصی کے غمگسُار سلام
تمھارے در سے ملا جس کو بھی ملا جو مِلا
تمھاری بخششِ بیحد پہ صد ہزار سلام
تمھارا ابرِ کرم کِس جگہ نہیں برسا
تمھارے لطف و کرم پر ہزار بار سلام
جس آستانہء اقدس کی خاک ہے اعظمؔ
اُس آستانِ معلّیٰ پہ بار بار سلام
شاعر کا نام :- محمد اعظم چشتی
کتاب کا نام :- کلیاتِ اعظم چشتی