آخر نگہ میں گُنبدِ اَخضَر بھی آئے گا

آخر نگہ میں گُنبدِ اَخضَر بھی آئے گا

آنکھوں میں کوئے نور کا منظر بھی آئے گا

---

ساقی مرا کریم ہے ، محشر میں حوض پر

ہاتھوں میں اپنے ساغرِ کوثر بھی آئے گا

---

ہم سے گُناہ گار ، چُھڑانے کے واسطے

معلوم ہے کہ شافعِ محشر ﷺ بھی آئے گا

---

چشمِ کرم حضور ﷺ ! کہ رستہ یہ پا سکے

بُھولا ہوا ہے ، شام کو یہ گھر بھی آئے گا

---

بیتِ حرم میں جا نہیں سکتے ہیں مومنین

کس کو خبر تھی وقت یہ بدتر بھی آئے گا

---

جاری رہے گا آپ ﷺ کی مدحت کا سلسلہ

ہر دور میں حضور ﷺ ! سُخن ور بھی آئے گا

---

آہ و فغاں غُلام کی سُن کر وہ ایک دن

دیدار دینے خواب میں دلبر بھی آئے گا

---

ظُلم و ستم کی قوتِ خیبر کو توڑنے

ہر اک زماں میں پنجۂ حیدرؓ بھی آئے گا

---

صدقہ نبی ﷺ کی آل کا ، اُمید ہے ، ضرور

اُمّت میں اتّحاد کا جوہر بھی آئے گا

---

ہوگا اُنہی کا اُمّتی ، محشر میں سرخرو

ہاں اس کے دائیں ہاتھ میں دفتر بھی آئے گا

---

ترسا ہوں جس کے واسطے میں عمر بھر جلیل

آخر مرے نصیب میں وہ در بھی آئے گا