اچانک دشمنوں نے کی چڑھائی یارسولَ اللہ
ہوئے دوجاں بحق اسلامی بھائی یارسولَ اللہ
مِرا دشمن تو مجھ کو ختم کرنے آہی پہنچا تھا
میں قُرباں تم نے میری جاں بچائی یارسولَ اللہ
شہیدِ دعوتِ اسلامی سجّاد و اُحُد آقا
رہیں جنّت میں یکجا دونوں بھائی یارسولَ اللہ
عَدو جَھک مارتا ہے خاک اُڑاتا ہے ترے قرباں
مجھے اب تک نہ کوئی آنچ آئی یارسولَ اللہ
نہیں سرکار! ذاتی دشمنی میری کسی سے بھی
مِری ہے نفس و شیطاں سے لڑائی یارسولَ اللہ
شہا! دشمن ہوا ہائے! ہمارے خون کا پیاسا
دُہائی یارسولَ اللہ! دُہائی یارسولَ اللہ
حفاظت دشمنوں سے آپ ہی فرمائیے آقا
کہ مجھ کمزور پر کی ہے چڑھائی یارسولَ اللہ
مُقابِل دشمنِ اسلام کے ایسا بنا گویا
کوئی دیوار ہو سیسہ پِلائی یارسولَ اللہ
یِہی ہے جُرم میرا سنّتوں کا ادنیٰ خادِم ہوں
ہے میں نے سنّتوں سے لو لگائی یارسولَ اللہ
اگرچِہ لاکھ دشمن دھمکیاں دے جان لینے کی
کسی سے کیوں ڈرے تیرا فِدائی یارسولَ اللہ
اگرچِہ جان جائے خدمتِ سنّت نہ چھوڑوں گا
شہا! کرتے رہیں مُشکِل کُشائی یارسولَ اللہ
کسی صورت بھٹک سکتا نہیں میں راہِ سنّت سے
مجھے حاصِل ہے تیری رہنمائی یارسولَ اللہ
ہِدایت دشمنوں کو یانبی! ایسی عطا کر دو
یہ بن جائیں مِرے اسلامی بھائی یارسولَ اللہ
تمنّا ہے مِرے دشمن کریں توبہ عطا کر دو
انھیں دونوں جہاں کی تم بھلائی یارسولَ اللہ
بچالو! نارِ دوزخ سے بِچارے حاسِدوں کو بھی
میں کیوں چاہوں کسی کی بھی بُرائی یارسولَ اللہ
حُقُوق اپنے کئے ہیں درگزر دشمن کو بھی سارے
اگرچِہ مجھ پہ ہو گولی چلائی یارسولَ اللہ
بَہَر صو رت مجھے مر نا پڑے گا پَر سعادت ہے
شہادت راہِ سنّت میں جوپائی یارسولَ اللہ
اندھیری قبر سے شاہِ مدینہ خوف آتا ہے
نظر میں نے ہے رَحمت پر جمائی یارسولَ اللہ
تمنّا ہے ترے عطارؔ کی یوں دھوم مچ جائے
مدینے میں شہادت اِس نے پائی یارسولَ اللہ
شاعر کا نام :- الیاس عطار قادری
کتاب کا نام :- وسائلِ بخشش