اچیاں نے شاناں او یار نبی مختار دیاں
اللہ دے حبیب دیاں ساڈی سرکار دیاں
اکو تیری یاد روئے بُھل جان غم سوہنیاں
اساں مسکیناں اُتے کر دے کرم سوہنیا
ولاں شالا سک نہ جاون تتڑی دے پیار دیاں
اچیاں نے شاناں او یار نبی مختار دیاں
جنی وی حیاتی میری کرم کمائی رکھناں
میرے جئے گناہیاں نوں وی در تے بلائی رکھناں
من گھن عرضیاں شہا عاصی گنہ گار دیاں
اچیاں نے شاناں او یار نبی مختار دیاں
آقا جبریل جئے خدمتاں کرن تیریاں
نوری تیرے بچیاں دیاں کر دے نوکریاں
عظمتاں نے بڑیاں شہا تیرے گھر بار دیاں
اچیاں نے شاناں او یار نبی مختار دیاں
چاؤندے او جے ہون رحمتاں دُر یتیم دیاں
عاصیو سجاؤ محفلاں مدنی کریم دیاں
سنگتاں حضور دیاں ڈبیاں نوں تار دیاں
اچیاں نے شاناں او یار نبی مختار دیاں
صدقہ حسنین دا در تے بلا سوہنیاں
کول بلا سوہنیاں لیکھاں نوں جگا سوہنیاں
لکیاں نے تاہنگاں شہا تیرے دربار دیاں
اچیاں نے شاناں او یار نبی مختار دیاں
مال بھاویں جگ دا نہ دے رحمتاں لٹان والیا
میرے تے وی نظر کرم بگڑی بنان والیا
خیراں دن رات منگاں میں تے سرکار دیاں
اچیاں نے شاناں او یار نبی مختار دیاں
ملیا نصیباں والیاں نوں ہے دوارہ آپ دا
اوہ نہیں سہارے لبھدے جہناں نوں سہارا آپ دا
مشکلاں دے وچہ غیراں نوں واجاں نئیں اوہ مار دیاں
اچیاں نے شاناں او یار نبی مختار دیاں
ترسدیاں اک سوہنیاں روضے دے دیدار لئی
گلی گلی پھر دیاں پیاں سینے تیرا پیار لئی
اک تک تک روضے نوں اکھیاں نوں ٹھار دیاں
اچیاں نے شاناں او یار نبی مختار دیاں
عرضاں نیازی دیاں من گھن نام خدا
ہور کچھ دے یا نہ دے اکو ہے سوال مرا
کر دے عطا دولتاں اکھاں نوں دیدار دیاں
اچیاں نے شاناں او یار نبی مختار دیاں
شاعر کا نام :- عبدالستار نیازی
کتاب کا نام :- کلیات نیازی