اپنی نسبت سے میں کچھ نہیں ہوں

اپنی نسبت سے میں کچھ نہیں ہوں

اس کرم کی بدولت بڑا ہوں

---

ان کے ٹکڑوں سے اعزاز پا کر

تاجداروں کی صف میں کھڑا ہوں

---

اس کرم کو مگر کیا کہو گے

میں نے مانا میں سب سے برا ہوں

---

جو بروں کو سمیٹے ہوئے ہیں

اُن کے قدموں میں میں بھی پڑا ہوں

---

دیکھنے والو مجھ کو نہ دیکھو

دیکھنا ہے اگر تو یہ دیکھو

---

کس کے دامن سے وابستہ ہوں میں

کون والی ہے کس کا گدا ہوں

---

دیکھتا ہوں جب ان کی عطائیں

بھول جاتا ہوں اپنی خطائیں

---

سر ندامت سے اٹھتا نہیں ہے

جب میں اپنی طرف دیکھتا ہوں

---

یا نبی! اپنے غم کی کہانی

کہہ سکوں گا نہ اپنی زبانی

---

بِن کہے ہی میری لاج رکھ لو

میں سسکتی ہوئی التجا ہوں

---

شافعِ مُذنباں کے کرم نے

لاج رکھ لی میرے کھوٹے پن کی

---

نسبتوں کا کرم ہے کہ خالد

کھوٹا ہوتے ہوئے بھی کھرا ہوں