عجب جشنِ بہاراں ہے

عجب جشنِ بہاراں ہے ، شجر خوشیاں مناتے ہیں

شجر ہی کیا یہاں برگ و ثمر خوشیاں مناتے ہیں

---

مرے آقا کی اِس دُنیا میں آمد کا مہینہ ہے

زمین و آسماں ، شمس و قمر خوشیاں مناتے ہیں

---

پلٹ کر جب بھی آتا ہے مہینہ اُن کی آمد کا

تو دیوانے یہاں بارِ دگر خوشیاں مناتے ہیں

---

ملا جن کے تصدّق سے اِنہیں حُسنِ ضیا باری

تو شُکرانے میں یاں نجم و قمر خوشیاں مناتے ہیں

---

جزا خوشیاں منانے پر ملی ہے بُولہب کو بھی

ہیں ہم تو صاحبِ ایماں، نڈر خوشیاں مناتے ہیں

---

سبھی حُور و ملک غِلماں ، ہیں شاداں آسمانوں پر

زمیں پر بھی یہاں جنّ و بشر خوشیاں مناتے ہیں

---

قدومِ مُصطفٰےجا کر لگے یثرب کی دھرتی پر

مدینہ ہو گیا لوگو ! حجر خوشیاں مناتے ہیں

---

خوشی ہے دیدنی یارو ! محمّد کے غُلاموں کی

جو اُن کی یاد میں شام و سحر خوشیاں مناتے ہیں

---

سمجھ ہی جو نہیں پائے مرے مولا کے احساں کو

تو وہ آقا کی آمد پر کدھر خوشیاں مناتے ہیں

---

ربیعُ النُّور کی بارہ جو گھر گھر میں اُجالا ہے

تو اِنساں ہی نہیں لوگو ! یہ گھرخوشیاں مناتے ہیں

---

کیا احسان مولا نے حبیب اپنا ہمیں دے کر

جلیل اِس بات پر اہلِ نظر خوشیاں مناتے ہیں