آپ کی جلوہ گری ہوتی نہ گر منظورِ حق
پھر نہ ہوتے عرش و کرسی چاند سورج گل شفق
ہو گئے اس وقت سارے چہرۂ کفار فق
جب کیا سرکار نے فاران سے اعلانِ حق
ہو گیا جلوہ فگن جب دینِ حق کا آفتاب
گلشنِ ہستی میں آئی موسمِ گل کی رمق
صبحِ بطحا شامِ طیبہ کا عجب نظارہ ہے
دیکھ کر شیدائے نظارہ ہوا رنگِ شفق
ہو مبارک، اب جہاں میں عدل گستر آگئے
لڑکیوں سے اب نہ چھینا جائے گا جینے کا حق
بے زباں پتھر نے پایا ہے گواہی کا شرف
جبنشِ انگشتِ سرور سے ہوا مہتاب شق
وہ شبِ معراج شانِ رفعتِ ذاتِ نبیؐ
آپ کے زیرِ قدم تھے عرش کے ساتوں طبق
سنگِ اسود نصب کرنے میں ہوئے فیصل جب آپؐ
کر دیا آسان پل میں مسٔلہ تھا جو ادق
یا خدا کردے عطا اس درد کا درماں نصیب
قلبِ احسؔن میں ہے ہجرِ کوئے طیبہ کا قلق
شاعر کا نام :- احسن اعظمی
کتاب کا نام :- بہارِ عقیدت