اپنے اللہ سے محبوب کا در بھی مانگو
مانگنے والو ! مدینے کا سفر بھی مانگو
مانگنا جرم نہیں عشق نبی کی دولت
عشق ہے دل میں تو پھر حسنِ نظر بھی مانگو
دل وہ مانگو کہ رہیں جس میں نبی کی یادیں
گر کے قدموں پہ جو اُٹھے نہ وہ سر بھی مانگو
رشک کرتی ہے جنہیں دیکھ کے فردوس بریں
وہ مدینے کے حسیں شام و سحر بھی مانگو
مانگو محبوب سے محبوب کے جلوؤں کا خمار
اُن کے جو نام پہ تڑپے وہ جگر بھی مانگو
تم طلب کرتے ہو دنیا کے حسیں تاج محل
ان کے کوچے میں کوئی چھوٹا سا گھر بھی مانگو
تیرے دامن میں زر وسیم نیازی ہیں تو کیا
عشق سرکار میں اشکوں کے گہر بھی مانگو
شاعر کا نام :- عبدالستار نیازی
کتاب کا نام :- کلیات نیازی