عاشقِ خیر الوریٰ ہوجائیے
حُبِ شہ کا آئنہ ہوجائیے
صدق دل سے مثلِ اصحابِ نبیؐ
جاں نثارِ مصطفیٰؐ ہوجائیے
رشک سلطانی کرے گی آپ پر
کوئے سرور کے گدا ہوجائیے
دل میں پیدا کیجیے سوزِ بلال
رمزِ حق سے آشنا ہوجائیے
خواہشِ اوجِ ثریا ہے اگر
خاکِ کوئے مصطفیٰؐ ہوجائیے
جو کرے دنیا میں تضحیکِ نبیؐ
ایسے رشدی سے جدا ہوجائیے
آپ ہیں صدیق کے شیدا اگر
پیکرِ صدق و صفا ہوجائیے
پھر عمر سے رہنما کے واسطے
پیشِ رب محوِ دعا ہوجائیے
سیرتِ عثماں غنی کا واسطہ
مظہرِ حلم و حیا ہوجائیے
کیجیے توقیرِ بوبکر و عمر
پیروِ شیرِ خدا ہوجائیے
آگیا ہے سامنے شہرِ نبیؐ
با ادب احسؔن ذرا ہوجائیے
شاعر کا نام :- احسن اعظمی
کتاب کا نام :- بہارِ عقیدت