بادہء عشق نبی پی کے بھی پیاسیں نہ گئیں

بادہء عشق نبی پی کے بھی پیاسیں نہ گئیں

دل کبھی سیر نہ پایا کبھی آنکھیں نہ بھریں

---

کوئی حیرت نہیں اس بے سر و سامانی پر

خوش ہوں اس پر کہ مری رات کی آہیں نہ گئیں

---

شوق بے تاب مگر پاس ادب تھا مانع

سامنے ائے تو بوسے کو نگاہیں نہ اٹھیں

---

کوئی سینے سے مرے کان لگا کر تو سنے

تھم گئی سانس مگر دل کی صدائیں نہ رکیں

---

کیسے کیسے نہ صنم خانے نظر سے گزرے

جز تیرے اور کسی سے مری آنکھیں نہ لڑیں

---

امتحاں کو ترے اٹھے تھے خدایانِ سخن

جب ترے سامنے آئے تو زبانیں نہ کھلیں

---

وقت کا سیل بہا لے نہ گیا کس کس کو

پر ترے پاؤں کے تلووں کی لکیریں نہ مٹیں

---

موجہء وقت نے کس کس کے کیے گل نہ چراغ

ترے ہاتھوں کی جلائی ہوئی شمعیں نہ بجھیں

---

کتنے گلشن ہوئے تبدیل بیابانوں میں

ترے قرباں ترے گلشن کی بہاریں نہ لٹیں

---

ہائے وہ عہدِ رسالت کی بہاریں اعظم

سامنے بیٹھ کے سرکار کی باتیں نہ سنیں