بادشاہی ماہ سے ہے تا بہ ماہی آپؐ کی

بادشاہی ماہ سے ہے تا بہ ماہی آپؐ کی

یہ زمیں، یہ چاند، دیتے ہیں گواہی آپؐ کی

---

آپؐ ہیں نُورِ ازل، محبوبِ ربِّ کائنات

جان و دل، ارض و سما پر بادشاہی آپؐ کی

---

غیر ممکن ہے کسی سے آپؐ کی مدح و ثنا

ہے ثنا خواں آپ جب ذاتِ الٰہی آپؐ کی

---

کی امامت انبیؑاء کی آپؐ نے معراج میں

مان لی اک اک نبیؑ نے سربراہی آپؐ کی

---

کثرتِ عصیاں سے نادم ہُوں، نہیں مایوس مَیں

ڈھال ہے میرے لیے عالَم پناہی آپؐ کی

---

اک نگاہِ لُطف سے سب کام میرے بن گئے

حشر میں کام آئی میرے، خیر خواہی آپؐ کی

---

بے نیازِ مال و منصب ہے نصیرؔ سیر چشم

آپؐ کے خادِم کو کافی ہے دُعا ہی آپؐ کی