باخبر سرِ حقیقت سے وہ مستانے ہیں

باخبر سرِ حقیقت سے وہ مستانے ہیں

جن کی قسمت میں ترے عشق کے پیمانے ہیں

---

اب تو بے خواب نگاہوں کو دکھا دو جلوہ

کب سے محروم بہاروں سے یہ ویرانے ہیں

---

لاج رکھنا مرے سرکارؐ کریمی ہوگی ،

بس مرے پاس تو نعتوں کے یہ نذرانے ہیں

---

لوحِ محفوظ پہ رہتی ہیں نگاہیں انکی

میرے آقامرے مولا کے جو دیوانے ہیں

---

اپنی رحمت سے انہیں رنگ حقیقت دے دو

مری ہستی کے جو بکھرے ہوئے افسانے ہیں

---

عشقِ سرکارؐ مدینہ کی جو پیتے ہیں شراب

ان کی آنکھیں نہیں توحید کے میخانے ہیں

---

چشمِ عالم میں ضیا بن کے رہا کرتے ہیں

واقعی شمعِ رسالتؐ کے جو پروانے ہیں

---

اُن کو بس اُنکو سمجھتا ہوں میں اپنا خالدؔ

یادِ سرورؐ میں جو کونین سے بیگانے ہیں