دِل میں نبیؐ کی یاد بسی ہے زہے نصیب
دنیائے عِشق جھوم رہی ہے زہے نصیب
ہم مَست آج کے نہیں مَستِ اَلست ہیں
مَے عِشقِ مُصطفےٰ کی ملی ہے زہے نصیب
محشر میں بات خوب بنی ہے زہے نصیب
سَر پر رِ دائے لطفِ نبیؐ ہے زہے نصیب
ہر شے میں دیکھتے ہیں تجلی حضورؐ کی
شائستگی نظر کو مِلی ہے زہے نصیب
جِس در پہ سر جھکانا ہے مقصودِ زندگی
میری جبین ِ شوق جھکی ہے زہے نصیب
اغیار کے کرم سے نہیں ہوں میں شرمسار
جھولی مِری تمہی نے بھری ہے زہے نصیب
محبوب کی رضا ہے رضائے خدائے حشر
میزان اک طرف کی دھری ہے زہے نصیب
خالدؔ ہے نازِ نسبت سرکارؐ پر مجھے
نعمت بھی بہترین یہی ہے زہے نصیب
شاعر کا نام :- خالد محمود خالد
کتاب کا نام :- قدم قدم سجدے