دونوں عالم میں ہے دن رات اُجالا تیرا

دونوں عالم میں ہے دن رات اُجالا تیرا

چھَب انوکھی ہے تری، حُسن نرالا تیرا

---

غنچہ و گُل میں ترے نقشِ کفِ پا کی جھلک

ہے بہارِ چمنستاں میں اُجالا تیرا

---

مظہرِ نورِ ازل، مصدرِ انوارِ ابد

از ازل تا بہ ابد نُور دو بالا تیرا

---

اے شہِ ؐ حُسن! دو عالم ترے قدموں پہ نثار

خود بھی شیدائی ، اللہ تعالیٰ تیرا

---

زینتِ بزمِ جہاں، صورتِ زیبا تیری

سروِ گُلزارِ حقیقت، قدِ بالا تیرا

---

جس جگہ تیری جھلک ہو، تری رعنائی ہو

جا ٹھہرتا ہے وہیں، دیکھنے والا تیرا

---

شبِ معراج ہے عنوان تری رفعت کا

ذات ارفع ہے تری ذکر ہے اعلیٰ تیرا

---

تُو ہے وہ شمعِ ضیا بار دو عالم کے لیے

ڈھونڈتے پھرتے ہیں کونین اُجالا تیرا

---

میری مرقد سے نکیرین پلٹ جائیں گے

اُن کو مِل جائے گا جس وقت حوالا تیرا

---

فَسَیَکْفِیْکَہُمُ اللّٰہ سے یہ بات کُھلی

تُو ہے اللہ کا، اللہ تعالیٰ تیرا

---

حشر میں ایک قیامت مِرے دل پر گزری

بن گئی بات، وسیلہ جو نکالا تیرا

---

صدقِ دل سے ہے نصیرؔ اہلِ طلب میں شامل

آسرا حشر میں ہے اے شہِؐ والا! تیرا