ہر ایک جلوہ ہے پنہاں ہمارے سینے میں

ہر ایک جلوہ ہے پنہاں ہمارے سینے میں

مدینہ دل میں ہے سرکارؐ ہیں مدینے میں

---

ہیں اس سفینے سے خائف بھنور بھی طوفاں بھی

تمہیں پکارنے والے ہیں جس سفینے میں

---

یہ دل ہے عرش الہٰی ہے انکی منزل ہے

ہے کائنات کا حاصل اسی نگینے میں

---

نثار عشق ِ محمد ؐ جراحتوں کے چمن

کھِلا ہے گلشنِ جنت ہمارے سینے میں

---

ترے فقیر کی جھولی رہے گی کیوں خالی

ہے دو جہاں کا خزانہ ترے خزینے میں

---

کمالِ حُسنِ تصور بھی ہے کرم ان کا

کہ دور رہ کے بھی رہتے ہیں ہم مدینے میں

---

مری حیات کے بکھرے ہوئے ہیں سب اجزا

حضورؐ آئیں تو آجائیں گے قرینے میں

---

بہار ساز ہیں خوشبو نواز گل پرور

وہ نکہتیں جو ہیں سرکارؐ کے پسینے میں

---

کر م ہو ان کا تو جائیں مدینے ہم خالدؔ

بہار لوٹیں کرم کی سدا مدینے میں