ہر گھڑی سیرتِ اطہر سے ضیا ڈھونڈیں گے

ہر گھڑی سیرتِ اطہر سے ضیا ڈھونڈیں گے

’’آپؐ کی سیرتِ اطہر سے ضیا ڈھونڈیں گے‘‘

---

کل بھی انسان کی عظمت کا یہی تھا ساماں

آج بھی سیرتِ اطہر سے ضیا ڈھونڈیں گے

---

اسوۂ سرورِؐ عالم کی مہک ہے ان میں

آل کی سیرتِ اطہر سے ضیا ڈھونڈیں گے

---

دامنِ آمنہؓ میں ماہِ منوّر اترا

مادری سیرتِ اطہر سے ضیا ڈھونڈیں گے

---

انؐ کے اوصافِ حمیدہ سے چنیں گے موتی

سرمدی سیرتِ اطہر سے ضیا ڈھونڈیں گے

---

ہم پہ لازم ہے کہ ہم آپؐ کے رستے پہ چلیں

’’آپؐ کی سیرتِ اطہر سے ضیا ڈھونڈیں گے‘‘

---

حبِ سرکارِ دو عالمؐ کو بسا کر دل میں

ہم سبھی سیرتِ اطہر سے ضیا ڈھونڈیں گے

---

صرف کچھ روز نہیں آپؐ کی سنت پہ رواں

دائمی سیرتِ اطہر سے ضیا ڈھونڈیں گے

---

ایک تصویر کے ہی رخ ہیں یہ قرآن و حضورؐ

امّتی سیرتِ اطہر سے ضیا ڈھونڈیں گے

---

اقتدا میں ہیں نبیؑ آپؐ کے سبحان اللہ

مقتدی سیرتِ اطہر سے ضیا ڈھونڈیں گے

---

تیرےؐ نعلین کا صدقہ ہیں یہ آداب تمام

ہم تریؐ سیرتِ اطہر سے ضیا ڈھونڈیں گے

---

اس سے ہٹ کر نہیں اک پل بھی گوارا طاہرؔ

ملتجی سیرتِ اطہر سے ضیا ڈھونڈیں گے