جس کو کوئی آپ کے جیسا لگا
کچھ نہ پوچھو وہ مجھے کیسا لگا
جب سے ذکرِ مصطفٰی اچھا لگا
تب سے اچھا اپنا آئینہ لگا
واعظو! جنت تمہیں محبوب ہے
ہم کو وہ، جنت کو جو اچھا لگا
مشکلیں مشکل میں پڑتی جائیں گی
یارسول اللہ کا نعرہ لگا
جب نظر اٹھی تھی روضے کی طرف
بس وہی اِک کام کا لمحہ لگا
نقشِ نعلینِ محمد مصطفٰیﷺ
تاجِ شاہاں سے کہیں اونچا لگا
چاہئیے گر چشمِ نم کو روشنی
خاکِ طیبہ کا وہاں سرمہ لگا
ہم سمجھتے ہیں جسے رشکِ ارم
کچھ عناصر کو فقط طیبہ لگا
تھا تبسم جالیوں کے روبرو
پھر سنبھلنے میں اسے عرصہ لگا
شاعر کا نام :- حافظ محمد ابوبکر تبسمؔ
کتاب کا نام :- حسن الکلام فی مدح خیر الانامؐ