جوان کے نقشِ قدم پر ہیں سر جھکائے ہوئے

جوان کے نقشِ قدم پر ہیں سر جھکائے ہوئے

وہی تو منزل ِ مقصود کو ہیں پائے ہوئے

---

درِ نبیؐ پہ جلاتے ہیں آرزو کے چراغ

بساطِ زیست پہ دنیا سے مات کھائے ہوئے

---

ہے ذرے ذرے میں اب تک حضورؐ کا جلوہ

حقیقتیں ہیں ابھی تک نقاب اٹھائے ہوئے

---

پڑھو درود پڑھو ذوق و شوق کہتا ہے

کہ آج بزم میں سرکارؐ بھی ہیں آئے ہوئے

---

سنا کہ مژدہ عطاؤں کا سرخرو کردو

گناہ گار ہوں بیٹھا ہوں منہ چھپائے ہوئے

---

وہ خوش نصیب غمِ دوجہاں سے فارغ ہیں

جو ان کے لطف و کرم سے ہیں لَو لگائے ہوئے

---

متاعِ درودِ محمدؐ ہی مانگ لو رب سے

نظر اٹھاؤ ہیں بادل کرم کے چھائے ہوئے

---

ہمارے پا س کوئی اَور چیز بھی تو نہیں

ہم اپنے اشک ہی پلکوں پہ ہیں سجائے ہوئے

---

ہے ان کی یاد سے آباد میرا دل خالدؔ

ہیں میرے دیدہ و دل دونوں جگمائے ہوئے