کر ذکر مدینے والے دا
کوئی اس تو چنگی بات وی نہیں
جیہنے یار نوں راضی نہیں کیتا
اوہدی ہونی مول نجات وی نئیں
اوہدی مثل وی نیں تے مثال وی نہیں
اوہدی آل جئی کوئی آل وی نہیں
اک لکھ تے کئی ہزار وچوں
اس ذات جئی کوئی ذات وی نہیں
سب راتاں شاناں والیاں نے
سب راتاں قدراں والیاں نے
ہو وے جس وچ ذکر محمد دا
اس رات جئی کوئی رات وی نئیں
چھڈ ذکر مدینے والے دا
کراں تذکرے پھل تے بلبل دے
اوہ میرے کول زبان وی نئیں
میرے کول اوہ قلم دوات وی نئیں
میرے اتھرو لے جا وائے نی
چن مدنی دے دربار اندر
محبوب نوں آکھیں ودھ اس توں
کوئی میرے کول سوغات وی نہیں
ہو جاوے وچ حیاتی دے
دیدار جے شہر مدینے دا
ایدوں ودھ کے مقدر نہیں ہونے
ایدوں و دھکے نیک برات وی نئیں
میرے پلے دولت دھن وی نہیں
کوئی کول نیازی فن وی نئیں
اوہدے نام توں جگ پہچان دا اے
میری کوئی ہور اوقات وی نئیں
الله دا اوہ محبوب وی اے
محبوب وی اے مطلوب وی اے
جیہنوں راتو رات کرائیاں نے
رب سیراں عرشوں پار دیاں
ساڈا شافع رب دا پیارا ہے
سانوں ایہہ وی بڑا سہارا ہے
رب نے مختاریاں دتیاں نے
جیہنوں محشر دے بازار دیاں
اوہدے حُسن تے ہر کوئی مردا اے
اوہدے ذکر تھیں سینہ ٹھر دا اے
دو جگ کی رب وی کردا اے
صفتاں مدنی سرکار دیاں
پاتیل نیازی ہنجواں دا
آساں دے دیوے بالی جا
جاواں گے مدینے نوں اس دن
جدوں چٹھیاں آئیاں یار دیاں
شاعر کا نام :- عبدالستار نیازی
کتاب کا نام :- کلیات نیازی