کرم ان کا نہیں تو اور کیا ہے

کرم ان کا نہیں تو اور کیا ہے

جو بے مانگے گدا کو مل رہا ہے

---

میں کیا جانوں ہوں شاہانِ جہاں کو

میرے دامن میں صدقہ آپ کا ہے

---

جو میرے چاہنے والے ہیں لاکھوں

کسی مردِ قلندر کی دعا ہے

---

نشہ اتنا نہیں دیکھا کسی میں

نشہ جتنا نبی کی نعت کا ہے

---

ادب کا ہاتھ سے دامن نہ چھوٹے

کہ یہ دربارِ محبوب خدا ہے

---

نبی کا نام لیوا ہوں ازل سے

یہی اک مختصر میرا پتہ ہے

---

میں مشکل میں کسی کو کیوں پکاروں

مجھے میرے نبی کا آسرا ہے

---

ہوئی اس پر نبی کی چشم رحمت

جو محفل میں نبی کی آ گیا ہے

---

کریمی ہے کریم دو جہاں کی

مجھے جو کچھ ملا جتنا ملا ہے

---

میں جو کچھ ہوں وہ سب کچھ جانتے ہیں

میں کیا ہوں اور میری اوقات کیا ہے

---

نظر سب پر ہے اور سب کی خبر ہے

میرا آقا شہ ارض و سما ہے

---

خبر کر دو یہ میرے حاسدوں کو

میرے لج پال کی مجھ پر عطا ہے

---

بجھا سکتے نہیں طوفاں اس کو

دیا اُن کے کرم کا جل رہا ہے

---

حضور اپنے ہی دروازے پہ رکھنا

نیازی کی یہی اک التجا ہے