کشتیاں اپنی کنارے پہ لگائے ہوئے ہیں

کشتیاں اپنی کنارے پہ لگائے ہوئے ہیں

کیا وہ ڈوبیں، جو محمد کے تِرائے ہوئے ہیں

---

اشک آنکھوں میں تو ہونٹوں پہ درود اور سلام

اُن کے عشاق بھی کیا رنگ جمائے ہوئے ہیں

---

اُن کا دل کیوں نہ بنے روکشِ طُورِ سینا

جالیاں اُن کی جو سینے سے لگائے ہوئے ہیں

---

جلوہ فرما وہ ہوئے کیا مقام ِمحمود

ساری اُمّت کی نگاہوں میں سمائے ہوئے ہیں

---

قبر کی نیند سے اُٹھنا کوئی آسان نہ تھا

ہم تو محشر میں اُنہیں دیکھنے آئے ہوئے ہیں

---

ورفعنا لک ذکرک کا تصور لے کر

ہم نظر گنبدِ خضرٰی پہ جمائے ہوئے ہیں

---

بوسۂ در سے انہیں اب تو نہ روک اے درباں

خود نہیں آئے یہ مہمان بُلائے ہوئے ہیں

---

حاضر و ناظر و نور و بشر و غیب کو چھوڑ

شکر کر وہ تیرے عیبوں کو چھپائے ہوئے ہیں

---

نام آنے سے ابوبکرؓ و عمرؓ کا لب پر

تُو بگڑتا ہے، وہ پہلو میں سلائے ہوئے ہیں

---

ہے نصیرؔ اُنس کا گہوارہ مدینے کی زمیں

ایسا لگتا ہے کہ اپنے ہی گھر آئے ہوئے ہیں