لج پال نبی کملی والا من ٹھار وی اے غم خوار وی اے
اللہ دے خزانیاں دا سوہنا مالک وی اے مختار وی اے
کہدے نال مثال دیاں اوہدی اوہدی مثل مثال نہیں کوئی وی
سوہناں سوہنیاں دی سرکار وی اے جیہدا کوئی نیں اوہدا یار وی اے
اوہدی دو جگ تے مختاری اے اوہدی نال غریباں یاری اے
اللہ دا اوہ محبوب وی اے نالے نبیاں دا سردار وی اے
دم عشق دا جیہڑے بھردے نے دکھ سہہ کے سی نہ کر دے نے
محبوب دے عشق دا دم بھرنا آسان وی اے دشوار وی اے
نالے حشر دا شافع من دے نے نالے آکھن کچھ نہیں کر سکدا
ذرا دیکھو عقل بے عقلاں دی اقرار وی اے انکار وی اے
سوہنے دا فرش تے ڈیرا اے نالے عرش اُتے وی پھیرا اے
میرا ایمان ہے اس گل تے اوہ آر وی اے اوہ پار وی اے
ساڈا سوہناں نبی مکی مدنی اوہدے جیڈ نہ لوکو کوئی وی
کتے ٹریا جاوے یاراں وچہ کتے رفرف تے اسوار وی اے
اوہدے در دیاں یار کی باتاں نے اوتھے نور دیاں برساتاں نے
اوتھے ملن مراداں منگتیاں نوں اوہ ایسا سخی دربار وی اے
ایویں نہ نیازی نوں کوئی پیا مہنے مارے عملاں دے
منیاں اوہ او گنہار وی اے پر اوہدا آقا بخشنہار وی اے
اللہ دیا سوہنیاں محبوبا کر کرم غریب نیازی تے
تیرے نام اتوں بلہار وی اے تیری آل دا خدمت گار وی اے
شاعر کا نام :- عبدالستار نیازی
کتاب کا نام :- کلیات نیازی