مرحبا وہ روضۂ سرکار اللہُ غنی

مرحبا وہ روضۂ سرکار اللہُ غنی

بول اُٹھا جس نے کیا دیدار اللہُ غنی

---

مسجدِ نبوی کے وہ مینار اللہُ غنی

گُنبدِ خضرا کے وہ انوار اللہُ غنی

---

خوب صورت گلشنِ طیبہ کے سارے پھول ہیں

اُن کے صحرا کے وہ دلکش خار اللہُ غنی

---

حق نے والشمس و ضُحیٰ قرآن میں فرما دیا

جگمگاتا وہ رُخِ سرکار اللہُ غنی

---

رازِ والیلِ اِذا یغشیٰ ہُوئے لاریب جو

مصطفیٰ کے گیسوئے خمدار اللہُ غنی

---

لامکاں وہ پہنچ کر اِک آن ہی میں آگئے

شاہ کی معراج میں رفتار اللہُ غنی

---

امن کا مُژدہ دیا ہے خون کے پیاسوں کو بھی

ہے بلند اخلاق اور کردار اللہُ غنی

---

یُوں تو سارے ہی صحابہ شان والے ہیں مگر

حضرتِ صدیق یارِ غار اللہُ غنی

---

ربِّ سَلِّم کی صدا نے پار ہم کو کردیا

تیغ سے تھی تیز پُل کی دھار اللہُ غنی

---

اور اِک روشن غزل مرزا سُناو جھوم کر

خوب تھی نعتِ شہِ ابرار اللہُ غنی