پاک نبی دے ناں دا سکہ دو عالم وچ چلدا رہنا
اوہدے صدقے قہر الہی دُنیا اُتوں ٹل دا رہنا
دل میرے وچ بلدے رہندے بھانبڑ سدا جدائیاں والے
یاد اوہدی وچ میری اکھ چوں اک اک اتھرو ڈھل دا رہنا
لکھ طوفاں ہنیریاں آون لکھ بجھاوے ظالم دنیا
آپ دی یاد دا دیوا ساڈے دل دے اندر بل دا رہنا
جد تک رہتی دنیا اوہدے ناں دیاں بانگاں ملدیاں رہنیاں
پیندا مُل ہر دور دے اندر اوہدی اک اک گل دا رہنا
ناں شبیر دا لے کے عاشق دیندے رہن گے خون ہمیشہ
محشر تیکر دین اسلام دا بوٹا پُھل دا پھلدا رہنا
عاشق میرے پاک نبی دے ہندے رہن گے سدا زیادہ
اک اک کر کے کُل زمانہ اس سنگت وچ رلدا رہنا
صائم صدقہ نعت دا ہر اک نعمت رب توں ملدی رہنی
نعت دے صدقے نبی دے در توں ٹبر میرا پلدا رہنا
شاعر کا نام :- علامہ صائم چشتی
کتاب کا نام :- کلیات صائم چشتی