حیات کے لئے عنواں نئے ملے ہم کو
نئے حوالے، نئے سلسلے ملے ہم کو
سجے ہوئے تھے بسوں پر درود کے توشے
سلام پڑھتے ہوئے قافلے ملے ہم کو
قدم قدم پہ مدینے کی شاہراہوں میں
فلک کے چاند ستارے پڑے ملے ہم کو
درِ نبیؐ پر پہنچ کر جو آئینہ دیکھا
جبیں پہ چاند ستارے جڑے ملے ہم کو
وہ غارِ ثور، وہ غارِ حرا، وہ کوہِ احد
کہیں ارادے، کہیں حوصلے ملے ہم کو
جو رہگذار تھی وہ کہکشاں کی صورت تھی
گلاب جیسے سبھی راستے ملے ہم کو
شاعر کا نام :- اختر لکھنوی
کتاب کا نام :- حضورﷺ