اتھرو دیکھ نبی دی اکھ وچ عالم سارے رو پیندے نے
دیکھ سکے غم محبوب میرے دا چن تے تارے رو پیندے نے
جد کربل دی خُون چ ڈُبی دھرتی چیتے آجاندی اے
کسے وی دیس چ وسدے ہوون درداں مارے رو پیندے نے
جد طیبہ دا منظر چُپ چپیتاں چیتے آجاندا اے
بنھ پلکاں دے انج مٹ جاندے جویں کنارے رو پیندے نے
میں جد وچ جُدائی جاگاں نال میرے سب درد وی جاگن
میں روواں تے دیکھ کے مینوں درد وچارے رو پیندے نے
جد طیبہ دی وچ جُدائی تڑفن پھڑکن ویکھن میرا
دین دلاسہ لگے مینوں یار پیارے رو پیندے نے
ملن آجاندا یار اے کوئی جدوں مدینے جاون لگیا
صائم دے ارمان وچارے تھکے ہارے رو پیندے نے
شاعر کا نام :- علامہ صائم چشتی
کتاب کا نام :- کلیات صائم چشتی