وہ درد چاہئے مولا کہ چارہ ساز رہے

وہ درد چاہئے مولا کہ چارہ ساز رہے

اِک ایسی آنچ عطا کر کہ دل گداز رہے

---

ترا ہی عشق ہو دارین میں مِری پہچان

یہاں وہاں یہی تمغائے امتیاز رہے

---

یہی بہشتِ سماعت یہی بہشتِ کلام

حدیثِ دوست ترا سِلسلہ دراز رہے

---

تری صفاتِ کرم جب خُدا نے کیں تحریر

لِکھا ترا درِ رحمت ہمیشہ باز رہے

---

اور اِس کے بعد بصد انبساط و ناز و نشاط

تری نگاہ کو لکھّا کہ کارساز رہے

---

زباں کا وصف یہ ٹھہرا کہ دل کشائی کرے

بیاں کی شان یہ ٹھہری کہ دل نواز رہے

---

صفات نامے کے آخر میں یُوں کیا ارقام

حریمِ ناز رہے رونقِ نیاز رہے

---

یہ اُن کا شہرِ تجلّی یہ کثرتِ جلوہ

پلک نہ جھپکے لگاتار چشم باز رہے

---

ہجومِ جلوہ میں اپنے لئے دعا نِکلی

خُدا کرے کہ مری زندگی دراز رہے

---

نہ لِکھ سکے تری مدحت میں ایک موزوں سطر

اگر زمانہ ابد تک رقم طراز رہے

---

تقّربِ شبِ معراج کِس کی عقل میں آئے

اگر خُدا ہی یہ چاہے کہ راز راز رہے

---

مَیں اب ہمیشہ ہمیشہ رہوں گا محوِ درود

نظامِ وقت خلل ڈالنے سے باز رہے

---

خلُوصِ دل سے کوئی نعت ہی کہوں عاصؔی

گناہ گار ہُوں بخشش کا کچھ جواز رہے