یہ خوشبو مجھے کچھ مانوس سی محسوس ہوتی ہے

یہ خوشبو مجھے کچھ مانوس سی محسوس ہوتی ہے

مجھے تو یہ مدینے کی گلی محسوس ہوتی ہے

---

یقیناً یہ گزرگاہِ شہنشاہِ دو عالم ہے

فضا میں کس قدر پاکیزگی محسوس ہوتی ہے

---

میری بے نور آنکھوں نے چراغوں کی جگہ لے لی

مجھے اب وہ روشنی ہی روشنی محسوس ہوتی ہے

---

رُکی جاتی ہیں نبضیں اور قدم تھم تھم کے بڑھتے ہیں

مجھے اب قربتِ بابِ نبی ﷺ محسوس ہوتی ہے

---

اذان صبح دیتا ہے کوئی لحنِ بلالی میں

یکایک روح میں بالیدگی محسوس ہوتی ہے

---

ہوائیں گنگناتی ہیں ‘ فضائیں مسکراتی ہیں

میں کھویا جارہا ہوں ‘ بیخودی محسوس ہوتی ہے

---

جہاں میں اب کھڑا ہوں روضہ ء اقدس ہے یہ شاید

تڑپ سینے میں ‘ آنکھوں میں نمی محسوس ہوتی ہے

---

میں کچھ یوں دم بخود ہوں اس دیارِ رنگ و نکہت میں

کہ اپنی زندگی بھی اجنبی محسوس ہوتی ہے

---

جبیں میری عرق آلود ہے احساسِ عصیاں سے

بہت خوش ہوں مگر شرمندگی محسوس ہوتی ہے

---

یہ وہ ارضِ مقدس ہے جہاں کے ذرّے ذرّے میں

ابھی تک نکہت پائے نبی ﷺ محسوس ہوتی ہے

---

کہیں بدرالدجیٰ ﷺ کے نور سے فانوس روشن ہیں

کہیں نور الہدیٰ ﷺ کی آگہی محسوس ہوتی ہے

---

یہ کس شہر میں اقبؔال قسمت مجھ کو لے آئی

یہاں جو چیز ہے کتنی بڑی محسوس ہوتی ہے