ہیں فلک پر چاند تارے، سرورِ کونین سے

ہیں فلک پر چاند تارے، سرورِ کونین سے

پا رہے ہیں فیض سارے، سرورِ کونین سے

---

وہ نہ ہوتے تو نہ ملتیں دو جہاں کی نعمتیں

بخت جاگے ہیں ہمارے، سرورِ کونین سے

---

عرش و فرش و لوح و کرسی سب کا ہے ان سے وجود

خُلد کے رنگیں نظارے، سرورِ کونین سے

---

مِل چکے ہیں مِل رہے ہیں اور ملتے جائیں گے

بے سہاروں کو سہارے، سرورِ کونین سے

---

ہے حقیقت ہم پہ اے آصف مسلسل رات دن

رحمتیں ہیں رب کے پیارے، سرورِ کونین سے