ادب گاہِ دوعالم ہے یہاں دستک نہیں دیتے

ادب گاہِ دوعالم ہے یہاں دستک نہیں دیتے

فرشتے جانتے ہیں وہ کہاں دستک نہیں دیتے

---

کھڑے رہتے ہیں دروازے پہ سائل کی طرح برسوں

ہم ایسے بے وجود و بے زباں دستک نہیں دیتے

---

گزر جاتے ہیں خوشبو کی طرح چُپ چاپ گلیوں سے

مدینے میں ہوا کے سائباں دستک نہیں دیتے

---

ہم ایسے واقفانِ راز ہائے شہرِ خوش بختاں

وہاں پلکیں بچھاتے ہیں وہاں دستک نہیں دیتے

---

یہی اِک بارگاہِ نُور ہے کونین میں تنہا

جہاں پر احتراماً آسماں دستک نہیں دیتے

---

پرندے ہوں ، درندے ہوں، کہ ہوں مہکے ہوئے موسم

مدینے کی زمیں پر نغمہ خواں دستک نہیں دیتے

---

یہاں پر عاجزی کی چادریں سب اوڑھ لیتے ہیں

یہاں چھوٹے بڑے سب کارواں دستک نہیں دیتے

---

وہاں کچھ اور ہی اسلوب ہیں آواز دینے کے

وہاں پر میرے انجؔم میری جاں دستک نہیں دیتے