دستِ طلب ہوں دستِ کرم چاہتا ہُوں میں

دستِ طلب ہوں دستِ کرم چاہتا ہُوں میں

غم تو بہت ہیں آپؐ کا غم چاہتا ہُوں میں

---

زادِ سفر بھی چاہئے اذنِ سفر کے ساتھ

مجھ پر کرم ہے اور کرم چاہتا ہُوں میں

---

اے رہنمائے انفس و آفاقِ کائنات

بس آپؐ ہی کے نقش قدم چاہتا ہوں میں

---

رحمت مآبؐ دیدہ و دِل پر بھی اِک نگاہ

دل کا گداز آنکھ کا نم چاہتا ہوں میں

---

کعبہ ہو میرے دِل میں مدینہ نگاہ میں

دونوں تجلّیوں کو بہم چاہتا ہُوں میں

---

آقاؐ عطا ہو مُجھ کو بھی عرفانِ بندگی

اپنی نظر میں اپنا بھرم چاہتا ہوں میں

---

لکھنی ہے ذرّہ ذرّہ پہ مدحِ حبیبِؐ پاک

شایانِ شان لوح و قلم چاہتا ہوں میں

---

ہر لحظہ محوِ یادِ خدا ہوں مگر حضوؐر

کیسے کہوں کہ آپؐ کو کم چاہتا ہوں میں