ہے فضلِ کردگار مدینہ شریف میں

ہے فضلِ کردگار مدینہ شریف میں

جنت کی ہے بَہار مدینہ شریف میں

---

ہے جشنِ پُر وقار مدینہ شریف میں

خوشیاں ہیں بے شمار مدینہ شریف میں

---

چل اے دلِ فگار مدینہ شریف میں

مل جائے گا قرار مدینہ شریف میں

---

اے جذبِ شوق خاک کو گرد و غبار کو

آنکھوں سے تو بہار مدینہ شریف میں

---

اے عمرِ نا تمام بہت ہو گیا یہاں

جا زندگی گزار مدینہ شریف میں

---

اے چشمِ شوق تو بھی نظارہ یہ دیکھ لے

قدسی کی ہے قطار مدینہ شریف میں

---

بل کھاتے، مسکراتے، ابلتے ہیں ہر گھڑی

رحمت کے آبشار مدینہ شریف میں

---

مدت سے آرزو ہے یہی، میری روح کا

اے کاش ٹوٹے تار مدینہ شریف میں

---

احمدؔ کو فکرِ دنیا رُلائے گی کیا بھلا

ہیں اس کے غم گسار مدینہ شریف میں