ہم بھی ایک نعت سنانے کے لئے آئے
عاقبت اپنی بنانے کے لئے آئے ہیں
ہم بھی سرکار کے مداحوں کی آوازوں میں
اپنی آوازملانے کے لئے آئے ہیں
سیرت پاک کی محفل میں جو روشن ہیں چراغ
ان کی لو اور بڑھانے کے لئے آئے ہیں
نعت کا حق تو بھلا ہم سے ادا کیا ہوگا
تشنگی دل کی بجھانے کے لئے آئے ہیں
ہم نے دیکھا ہے مدینے میں جو پیارا موسم
خوشبوئیں اس کی لٹانے کے لئے آئے ہیں
ہم کو جلووں کی جو بارات نظر آئی وہاں
اس کی تصویر دکھانے کے لئے آئے ہیں
ہم نے سیکھے ہیں بزرگوں سے جو آدابِ ثناء
نسل حاضر کو سکھانے کے لئے آئے ہیں
نعت میں ڈھال کے رودادِ الم ملت کی
اپنے آقاؐ کو سنانے کے لئے آئے ہیں
فرد ِ عصیاں جو چھپائے نہیں چھپتی ہم سے
کالی کملی میں چھپانے کے لیے آئے ہیں
مختصر یہ ہے کہ ہم ذکر نبیﷺ سے اقبؔال
کوئی محفل کو جگانے کے لئے آئے ہیں
شاعر کا نام :- پروفیسراقبال عظیم
کتاب کا نام :- زبُورِ حرم