اک اک سے کہہ رہی ہے نظر اضطراب میں

اک اک سے کہہ رہی ہے نظر اضطراب میں

پھر لے چلو حضُورِ رسالت مآبؐ میں

---

اک شب دعائے نیم شبی کے جواب میں

مجھ کو مرے حضُورؐ نظر آئے خواب میں

---

دیکھا کہ سب ہے عکسِ خدو خالِ مُصطفٰؐے

جو کچھ لکھا ہُوا ہے خدا کی کتاب میں

---

صلِّ علیٰ بہ فیضِ جمالِ محمّدیؐ

جلوے حجاب میں تھے نہ آنکھیں حجاب میں

---

اک کیفِ سرمدی تھا کہ طاری تھا رُوح پر

حل ہو رہی ہو جیسے کرن آفتاب میں

---

میرے نصیب مجھ سے کچھ ارشاد بھی ہُوا

لیکن میں کچھ سمجھ نہ سکا اضطراب میں

---

دِل کیفیت میں غرق نظر حیرتوں میں گُم

محسُوس ہو رہا ہے کہ اب بھی ہوں خواب میں

---

اب تک یہ حال ہے کہ تصوّر کئے بغیر

اک شکل ہے کہ پھرتی ہے چشمِ پُر آب میں

---

اے رحمتِؐ تمام مُجھے یہ خبر نہ تھی

حصّہ مرا بھی ہے کرمِ بے حساب میں