اک نظر ایسی بھی مجھ پر مرے آقاؐ ہو جائے

اک نظر ایسی بھی مجھ پر مرے آقاؐ ہو جائے

قطرہ دریا تو نہیں ہوتا ہے ‘ دریا ہو جائے

---

مُجھ سے گمراہ پہ بھی بابِ کرم وا ہو جائے

دین کے نُور سے روشن مری دنیا ہو جائے

---

آپؐ کے وصف رگ و پے میں اُترتے دیکھوں

آپؐ کی طرح مری زندگی سادا ہو جائے

---

اسی حسرت میں گزرتے ہیں شب و روز مرے

جو کرم مجھ پہ ہُوا ہے وہ دوبارہ ہو جائے

---

اشک آنکھوں سے جو ٹپکیں تو دُعا بن جائیں

اس قدر تڑپوں کہ ہر سانس تقاضا ہو جائے

---

لب پہ آتا ہے تو ہر سانس میں بس جاتا ہے

دِل میں وہ نام اُتر جائے تو دِل کیا ہو جائے

---

سُن کے پڑھنے لگیں قدسی بھی مرے ساتھ حنیفؔ

دَر خورِ نعت کوئی شعر تو ایسا ہو جائے