جگہ جگہ تیریؐ محفل سجی ہوئی ہے ابھی

جگہ جگہ تیریؐ محفل سجی ہوئی ہے ابھی

زمیں پہ نُور کی بارش برس رہی ہے ابھی

---

ترؐا گزر ہو کبھی اُس طرف سے پھر شاید

وہ شب جہاں تھی وہیں پر رُکی ہوئی ہے ابھی

---

نگل گئی ہے زمیں چاند سے بدن لیکن

ترےؐ وجود کی خوشبو مہک رہی ہے ابھی

---

مجھے بُلایا نہیں اپنے شہر میں تُو نے

مرے خلوص میں شاید کوئی کمی ہے ابھی

---

ہوا کے دوش پہ اُڑتی رہے قیامت تک

تریؐ خوشی کے لیے نعت جو لکھی ہے ابھی

---

نجانے کتنا اندھیرا ہے چار سُو تا ہم

ترے ؐکرم سے مرے گھر میں روشنی ہے ابھی