جو بھی سرکار کی توصیف و ثنا کرتا ہے
سنّتِ ربِّ دو عالم وہ ادا کرتا ہے
خود ہی مشکل میں پڑی ہوتی ہے اس دم مشکل
نام مشکل میں جو آقا کا لیا کرتا ہے
ہے عقیدہ کہ وہ آتے ہیں مدد کو اس کی
جو مصیبت میں صدا ان کو دیا کرتا ہے
ٹوٹ جاتا ہے خدا سے بھی تعلق اس کا
قطع جو رشتہ پیمبر سے کیا کرتا ہے
قابلِ رشک ہیں بے شک وہ جہاں میںآصف
عشق جن کو بھی خدا ان کا عطا کرتا ہے
شاعر کا نام :- محمد آصف قادری
کتاب کا نام :- مہرِحرا