کب مدینے میں جانِ جاں ہم سے

کب مدینے میں جانِ جاں ہم سے

پھر سُنیں گے یہ داستاں ہم سے

---

اب خُدارا معاف کر دیجے

ہو گئی ہیں جو غلطیاں ہم سے

---

ایک پل بھی گریز کرتا نہیں

تیری رحمت کا آسماں ہم سے

---

تیرے رُخ کا یہ سب اُجالا ہے

سامنے ہے یہ کہکشاں ہم سے

---

تیرے صدقے میں پا لیا ساحل

گرچہ چُھوٹے تھے بادباں ہم سے

---

اِک قیامت غریب پر گُزری

تیرا روضہ ہُوا نِہاں ہم سے

---

تیری مدحت میں سارا قُرآں ہے

کیسے ہوگی شہا ! بیاں ہم سے

---

یہ ترا ہی تو فیضِ نسبت ہے

بولے جاتے ہیں بے زباں ہم سے

---

بے عمل ہیں پہ تیرے صدقے میں

لوگ رہتے ہیں خوش گُماں ہم سے

---

تُجھ سے دُوری کا یہ نتیجہ ہے

چِھن گیا ہے جو سائباں ہم سے

---

ہو کرم کی نگاہ ہم پر بھی

چھوٹ جائے نہ کارواں ہم سے

---

اُن کے در پر جلیل راحت ہے

کہہ رہے ہیں یہ جسم و جاں ہم سے