ملتا ہے وہاں کیا کیا رحمت کے خزانے سے

ملتا ہے وہاں کیا کیا رحمت کے خزانے سے

یہ راز تو کُھلتا ہے دربار میں جانے سے

---

الحمد ! پہنچ پائے ہم سے بھی مواجہ پر

بس چین ملا ، اُن کو احوال سُنانے سے

---

گھرمیں تو پڑھیں لیکن سرکارْ کے روضے پر

سینے میں پڑی ٹھنڈک اِک نعت سُنانے سے

---

جب نام ترا آقا ! آتا ہے مرے لب پر

بجتے ہیں مرے دِل میں پُر کیف ترانے سے

---

سرکارِ مدینہ سے عشق اور محبت کا

ہوتا ہے دَرُوں روشن اِک دیپ جلانے سے

---

دیکھا ہے زمانے میں توقیر بڑھی اُن کی

کرتے ہیں مودّت جو آقا کے گھرانے سے

---

اِس دہر میں چھائی تھی اِلحاد کی تاریکی

ہر چیز ہوئی روشن سرکار کے آنے سے

---

وہ دور اخوّت کا پھر لَوٹ کے آئے گا

سینوں میں عداوت کی یہ آگ بُجھانے سے

---

ہے پاس نہیں کُچھ بھی جس سے کہ اُجالا ہو

ہوگی یہ لحد روشن سرکار کے آنے سے

---

یُوں گھر میں جلیل اپنے مہکار سی رہتی ہے

حلقاتِ درود اِس میں ہر روز سجانے سے