پتا خدا کا خدا کے نبیؐ سے ملتا ہے

پتا خدا کا خدا کے نبیؐ سے ملتا ہے

یہ راستہ بھی انہیںؐ کی گلی سے ملتا ہے

---

نہ کوئی گوشہ زمیں کا ہے اس گلی کا جواب

نہ کوئی شہر دیارِنبیؐ سے ملتا ہے

---

درِ نبیؐ سے ملی ہے وہ بے کلی مُجھ کو

قرار قلب کو جس بے کلی سے ملتا ہے

---

شعُورِ ذات، شعُورِ نظر، شعُورِ حیات

ہے جن کے نام کا صدقہ اُنہیؐ سے مِلتا ہے

---

وہ جسمِ آئینہ پیکر وہ نُورِ ذات و صفات

کہیں خُدا سے کہیں آدمی سے ملتا ہے

---

ہے بات فخر کی لیکن شرف غلامی کا

دل و نگاہ کی پاکیزگی سے ملتا ہے

---

زہے یہ شوقِ زیارت‘ زہے یہ خواب حنیفؔ

کبھی کبھی مرا حِصّہ ابھی سے ملتا ہے