سرو گل زارِ ربِ جلیل آپ ہی ہیں

سرو گل زارِ ربِ جلیل آپ ہی ہیں

گلِ زیبائے باغِ خلیل آپ ہی ہیں

---

حشر تک امتوں کے کفیل آپ ہی ہیں

پیشِ معبود سب کے وکیل آپ ہی ہیں

---

آپ کا لوحِ محفوظ میں ہے تصرف

حکمتِ کبریا میں دخیل آپ ہی ہیں

---

آپ ہی باعثِ خلقتِ دو جہاں ہیں

مظہرِ رب، خدا کی دلیل آپ ہی ہیں

---

ایک وہ حسن تھا مصر میں جو بکا تھا

جس پہ دل بک گئے وہ جمیل آپ ہی ہیں

---

آپ ہی مدعائے کلیمی ہیں آقا

اور ظہورِ دعائے خلیل آپ ہی ہیں

---

اک نگاہِ کرم کا ہے محتاج نظمی

جود و انعام کی سلسبیل آپ ہی ہیں