شہرِ آقاؐ کو میں روانہ ہوں
خلدِ طیبہ کو میں روانہ ہوں
منزلِ عشق ملنے والی ہے
دل کے قبلہ کو میں روانہ ہوں
ہے سفر نعت کا سدا جاری
اوجِ رتبہ کو میں روانہ ہوں
بخت پائے گا برکتِ ہجرت
سنتِ شہؐ کو میں روانہ ہوں
ربِ کعبہ کا ہے کرم مجھ پر
حج و عمرہ کو میں روانہ ہوں
ہوں رہِ عشق میں تو ہوں زندہ
ورنہ عقبیٰ کو میں روانہ ہوں
رویتِ خلد ہونے والی ہے
روضۂ شہؐ کو میں روانہ ہوں
شاعر کا نام :- پروفیسر محمد طاہر صدیقی
کتاب کا نام :- ریاضِ نعت