نعت حال لوگوں پہ انگلیاں اٹھاتے ہیں

نعت حال لوگوں پہ انگلیاں اٹھاتے ہیں

لوگ کیوں فرشتوں پہ انگلیاں اٹھاتے ہیں

---

نشۂ حضوری سے جو کبھی نہیں نکلے

بے قصور رندوں پہ انگلیاں اٹھاتے ہیں

---

کیا حضورؐ سے کہ دوں ! کیا میں ان کو بتلا دوں!

یہ تمھارے بردوں پہ انگلیاں اٹھاتے ہیں

---

آسمان کا تھوکا منھ پہ آ کے گرتا ہے

آپ چاند تاروں پہ انگلیاں اٹھاتے ہیں!

---

ہیں غلام آقاؐ کے ، کام ہے غلامی سے

کس لیے غلاموں پہ انگلیاں اٹھاتے ہیں؟

---

انگلیوں کو تسبیحیں ہم بناتے ہیں تو کیوں

انگلیوں کی پوروں پہ انگلیاں اٹھاتے ہیں

---

محرمِ مدینہ ہیں جو حرم کے ہیں محرم

کون ایسے نیکوں پہ انگلیاں اٹھاتے ہیں

---

گر ہے نعت پر کوئی ، معترض تو غم نہ کر

لوگ تو صحیفوں پہ انگلیاں اٹھاتے ہیں

---

طاہرؔ آج کل کے لوگ فرطِ عشقِ شاہؐ پہ

اور نیک جذبوں پہ انگلیاں اٹھاتے ہیں