ٹر گئے جانی دلاں دے مکدیاں نئیں زاریاں
یاد کر کر روندیاں پیاں نے سیاں ساریاں
آخری دم تک وفاواں کر دے گئے نے جس طراں
نال ایہناں دے نبھاواں گے اسیں وی یاریاں
مٹھیاں مٹھیاں بولیاں اوہ بولدا ای ٹر گیا
کون ساڈے غم دیاں آ کے کرے غمخواریاں
کر گیوں توں محفلاں اج ساڈیاں سنجیاں او یار
ٹرگیوں دے کے جدائیاں لا کے ضرباں کاریاں
ریاض نے اوہدے رضا نوں پچھ کے دیکھو ذرا
کی ایہناں دے دل تے گذرے چلدیاں کنج آریاں
ساڈے پلے پے گئے عمراں دے رونے سنگیو
یار باہجوں کی کراں گے منزلاں نیں بھاریاں
کس طرح دیواں تسلی میں تیرے فاروق نوں
جپدیاں سی وقف تیرے لئی ایہہ خدمت گاریاں
کیہدیاں گلاں کراں میں کہدا کہدا نام لاں
تیرے سارے سنگیاں تیرے توں جاناں واریاں
میرے صوفی صاحب نے ساری حیاتی دوستو
محفلاں سوہنے نبی دے ناں دیاں شنگاریاں
توں سدا ڈنکے وجائے نے نبی دے نام دے
دسیا کیویں نبھائیاں جاندیاں نے یاریاں
اوہ طبیعت دا غنی سی اوہ سخی نواب سی
سی نواب الدین تھیں لائیاں جدوں دیاں یاریاں
آکھ دے گئے نے نیازی صوفی صاحب رات دن
لا لئود اللہ نبی دے نال پکیاں یاریاں
شاعر کا نام :- عبدالستار نیازی
کتاب کا نام :- کلیات نیازی