دل دا چین گوا بیٹھے آں
روگ عشقے دا لا بیٹھے آں
دنیا نوں ازما بیٹھے آں
تیرے در تے آ بیٹھے آں
نہیں جانا اسیں غیر دے ہوہے
مکدی گل مکا بیٹھے آں
دل نہ توڑیں مکھ نہ موڑیں
دل تیرے نال لا بیٹھے آں
لاج سوالی دی رکھ لیناں
جھولی نوں پھیلا بیٹھے آں
جچ دا نئیں کوئی نظراں دے وچ
یار دا درشن پا بیٹھے آں
اپنے یار دیاں یاداں تھیں
دل دی جھوک وسا بیٹھے آں
جس دن دا ماہی نوں تکیا
ہوش حواس ونجا بیٹھے آں
بھلا ہووے اُس بے پرواہ دا
دوئی دا حرف مٹا بیٹھے آں
لوں لوں میرا توں توں بولے
میں نوں مار مکا بیٹھے آں
اپنا سب کجھ یار نیازی
یار دے ناویں لا بیٹھے آں
شاعر کا نام :- عبدالستار نیازی
کتاب کا نام :- کلیات نیازی